கீட்ஸ் எனும் நட்சத்திரம்

A Poet is the most unpoetical of any thing in existence; because he has no Identity – he is continually in for – and filling some other Body – The Sun, the Moon, the Sea and Men and Women who are creatures of impulse are poetical and have about them an unchangeable attribute – the poet has none; no identity – he is certainly the most unpoetical of all God’s Creatures. – John Keats

புகழ்பெற்ற ஆங்கிலக் கவியான ஜான் கீட்ஸின் கவிதைகளை கல்லூரி பாடமாக வாசித்திருக்கிறேன்.

எனது ஆங்கிலப் பேராசிரியர் கீட்ஸின் தீவிர ரசிகர். அவர் கீட்ஸின் காதல் கவிதைகளை ரசித்து ரசித்து நிறைய சொல்லியிருக்கிறார். ஆங்கிலக் கவிதை உலகிற்கு கீட்ஸ் ஒரு அடையாளச் சின்னம். அதுவும் காதலின் குறியீடு.

காசநோயால் இளவயதில் கீட்ஸ் இறந்து போய்விட்டார் . அப்போது அவரது வயது இருபத்தைந்து . ஆறு வருசங்களே அவர் தொடர்ச்சியாக கவிதைகள் எழுதியிருக்கிறார். அதில் பெரும்பான்மையானவை காதல் கவிதைகள். அவனே ஒரு கவிதைக்காதலன். அவனது கவிதைகளை வாசித்த பெண்கள் அவனையே காதலனாக மனதில் வரித்து கொண்டு மகிழ்ந்தார்கள்.

Beauty is truth, truth beauty – that is all / you know on earth, and all ye need to know என்ற அவனது கவிதை வரிகள் ரொமான்டிக் கவிதையின் உச்சமென கொண்டாடப்பட்டன

கீட்ûஸக் காதலிக்காத பெண்களே இங்கிலாந்தில் இல்லை எனுமளவு புகழ்பெற்றிருந்தான் என்று பேராசிரியர் எப்போதுமே சொல்வார். கீட்ஸின் உருச்சித்திரம் அது உண்மை என்றே நம்ப வைக்கிறது.

பொதுவாக பாடமாக வைக்கபட்ட எந்த இலக்கியப்பிரதியும் வாசிக்க விருப்பமேயிருக்காது. தாமஸ் ஹார்டியும் ஹென்றி ஜேம்ஸ்சும் தமிழ்நாட்டில் கவனம் பெறாமல் போய்விட்டதற்கு முக்கிய காரணம் அவை ஆங்கிலத் துறைகளில் பாடமாக வைக்கபட்டதே. அதை வெறும்பாடப்புத்தகம் என இலக்கியம் படிக்கும் மாணவர்கள் கைவிட்டார்கள்.

பொதுவான இலக்கியவாசகர்கள் இது துணைபாட நூல் என்று ஏளனம் செய்து அவர்களை படிக்கவேயில்லை. ஒரே விதிவிலக்கு ஷேக்ஸ்பியர் மட்டுமே. பாடப்புத்தகமாக பல நூற்றாண்டுகாலமாக இருந்தும் இன்றும் அவர் தொடர்ந்து வாசிக்கபடுகின்றவராக இருக்கிறார்.

நான் கீட்ûஸ மிக தாதமாகவே வாசித்தேன். உணர்ச்சிபூர்வமான காதல்கவிதைகள் அவை. கீட்ஸின் தனிமையும் இயற்கையை அவர் புரிந்து கொண்ட விதமும் இதயத்தின் குரலை அவர் நெருங்கி கேட்ட விதமும் பிடித்திருந்தன. கீட்ஸின் கடிதங்கள் அவரது வாழ்க்கை குறிப்பேடு போலவே இருந்ததை வாசித்திருக்கிறேன். கீட்ஸின் கவிதைகளை விட அவரது கடிதங்கள் அதிக கவித்துவமானவை.

கீட்ஸி Fanny Brawne என்ற பெண்ணுக்கும் இடையில் உண்டான காதலைப் பற்றிய ஜேன் கேம்பியானின் Bright Star திரைப்படத்தை சமீபமாக பார்த்தேன். படமே ஒரு நீண்ட காதல்கவிதையாக உருக்கொண்டிருந்தது. அற்புதமான படமாக்க பட்டுள்ளது. கீட்ஸின் காதல்வரிகளை படம் அழகாக பயன்படுத்திக் கொண்டிருக்கிறது.

கேம்பியான் ஒவியர் போல காட்சிகளை திரைப்படத்தில் உருவாக்ககூடியவர். நுட்பமான படைப்பாளி. பெண் கதாபாத்திரங்களுக்கு அதுவும் சுதந்திரமான மனப்போக்கு கொண்ட பெண் கதாபாத்திரங்களுக்கு முக்கியத்துவம் தரும் படங்களை உருவாக்கியவர்.இந்த படத்தை ஆஸ்திரேலிய பிலம் கார்ப்பரேஷனும் பிரிட்டீஷ் நிறுவனமும் இணைந்து தயாரித்திருக்கின்றன.

கீட்ஸின் குடும்பத்தில் அவரது தாய் மற்றும் அண்ணன் காசநோயால் அவதிப்பட்டவர்கள். அதற்காக சரியான சீதோஷ்ண நிலை தேடி அவர்கள் பயணம் செய்வது வழக்கம். அப்படி ஒரு முறை ஸ்காட்லாந்தில் பயணம் செய்துவிட்டு திரும்பி கீட்ஸ் பேனி பிரௌன் வீட்டின் அருகாமையில் இருந்த நண்பனின் வீட்டில் சில காலம் வசித்திருக்கிறார். பதினெட்டு வயதிருக்க கூடும். அப்போது அந்த வீட்டில் இருந்த பேனி பிரௌன் மீது காதலாகி அவளுக்காக கடிதங்களுக்கும் கவிதைகளும் எழுதியிருக்கிறார்.

அந்த காதல் நிறைவேறவில்லை. வேறு ஒருவரை திருமணம் செய்து கொண்ட பிரௌன் தனக்கும் கீட்ஸிற்குமான காதலை வெளிஉலகம் அறியாமல் காப்பாற்றிவந்தார். இருபத்தைந்து வருசங்களுக்கு பிறகு அவளது கணவர் இறந்த பிறகு தன் பிள்ளைகளிடம் தனது காதல்பற்றி விவரித்திருக்கிறார். அப்போதும் தனது மரணம் வரை இதை உலகிற்கு தெரியப்படுத்த கூடாது என்று சத்தியம் வாங்கி கொண்டுவிட்டார்.

பிரௌனின் சாவிற்கு பிறகு அவளுக்கும் கீட்ஸிற்குமான காதல் வெளிப்படுத்தபட்டது. அவளுக்கு எழுதப்பட்ட காதல்கடிதங்கள் வெளியாகின. அதில் கீட்ஸ் பற்றி எரியும் காதல் உணர்ச்சிகளுடன் எழுதியிருக்கிறார். தனது காதல் மனநிலை பற்றி கீட்ஸின் கடிதவரிகள் முக்கியமானவை.

நான் ஆண்களோடு இருக்கும் போது சஞ்சலமற்றிருக்கிறேன். அவர்கள் சொல்வதை காது கொடுத்து கேட்கிறேன். முழுமையாக உள்வாங்கி கொள்கிறேன். ஒருவர் மீது கூட பொறாமை கொள்வதில்லை. சந்தேகம் வருவதில்லை. ஆனால் பெண்களோடு அப்படியிருக்க முடியவில்லை. பெண்களோடு சேர்ந்திருக்கும் போது என்னை மீறி மனது செயல்படுகிறது. எதையும் முழுமையாக கேட்க முடியவில்லை. எங்கே நான் ஏமாற்றபட்டுவிடுவேனோ என்ற எண்ணமே மேலோங்குகிறது.

பலநேரம் நான் வேதனை கொள்கிறேன். காதலிப்பதை போன்ற துயரம் வேறு எதுவுமேயில்லை. காதலன் தான் உலகின் மிக துயரமான மனிதன். அவன் காதலியை நினைத்து நினைத்து ஒரு பக்கம் சந்தோஷம் கொள்கிறான். மறுபக்கம் அது நிறைவேறாமல் போய்விடுமோ என்று உள்ளுற அழுகிறான். அந்த நிலையை தொடர்ந்து அனுபவித்து வருகிறேன் என்கிறார் கீட்ஸ்.

கீட்ஸின் கடிதங்களை ஆதாரமாக கொண்டே ஜேன் கேம்பியான் திரைக்கதை எழுதியிருக்கிறார். பியானோ படத்தின் மூலம் உலக அரங்கில் தனிப்புகழ்பெற்ற பெண் இயக்குனராக உயர்ந்த கேம்பியான் இந்த படத்தில் ஒரு கவியின் மனகொந்தளிப்பை வெகு சிறப்பாக காட்சிபடுத்தியிருக்கிறார். இந்த படத்தை போல கச்சிதமான தனித்துவமிக்க உடையலங்காரத்தை வேறு எந்த படத்திலும் நான் கண்டதேயில்லை.அந்த உடைகளே அவர்களின் மனநிலையை பிரதிபலிக்கின்றன. அது போலவே நிலக்காட்சிகள். என்ன அற்புதமான நிலவெளி அது. கனவில் இருந்து துண்டிக்கபட்டது போலவே இருக்கின்றன.

கவிதையின் வழியாகவே கீட்ஸின் காதல் வளர்கிறது. கவிதை தான் படத்தின் ஆதாரபுள்ளி. கீட்ஸின் நண்பனும் அவனை உள்ளுற வெறுக்கும் சக கவிஞனுமான சார்லஸ் அர்மிடேஜ் கதாபாத்திரம் மிக அழகாக படத்தில் காட்சிபடுத்தபட்டுள்ளது. கீட்ஸ் தன் காதலியோடு கவிதைகள் பற்றியே பேசுகிறான். கவிதை எந்த மனநிலையில் இருந்து உருவாகிறது என்பதை அவளுக்கு புரிய வைக்க முயற்சிக்கிறாள். அவர்களது பேசியபடியே நடந்து செல்லும் காட்சியும் அதன்பின்புலமும் மயக்கமூட்டுகின்றன.

பேனி கவிதையை உணரத் தெரிந்தவள். ஆனால் காதலின் மயக்கமற்றவள். அவள் சற்று விலகிய மனநிலையோடு தான் கிட்ஸ் உடன் பழகுகிறாள். அவளிடம் மனக்கொந்தளிப்பு இல்லை. அதை ஒரு சகஜமான நட்பாகவே கருதுகிறாள். ஆகவே மற்ற ஆண்களுடன் இயல்பாக அவளால் பழக முடிகிறது. ஆனால் கீட்ஸின் காதல்தீவிரம் அவளை தனக்கு மட்டுமே உரியவளாக எண்ணுகிறது.

அந்த மனநிலையை அவளிடம் தெரியப்படுத்துகிறார். அதை அவள் முழுமையாக ஏற்றுக் கொள்ளவேயில்லை. ஆனால் கீட்ஸின் மீது உள்ளுற காதல் இருப்பதை ஒத்துக் கொள்கிறாள் இந்த இரட்டை நிலையின் ஊசலாட்டம் கீட்ûஸ மனதடுமாற்றம் கொள்ள வைக்கிறது. . மூன்று வருடங்கள் தொடர்ந்த இந்த காதலில் கீட்ஸின் வளர்ச்சியை அவள் அறிகிறாள். காதல் தீவிரமடைகிறது. ஆனால் குளிரால் பாதிக்கபட்ட உடல்நலக்குறைவு கீட்ûஸ தனிமைப்படுத்தி மரணத்தில் கொண்டு சேர்க்கிறது.

The Eve of St Agnes and Ode to a Nightingale போன்ற கீட்ஸின் புகழ்பெற்ற கவிதைகள் படத்தின் பின்ணணியில் ஒலிக்கின்றன. Bright star, would I were stedfast as thou art என்ற கவிதையே அவரது காதலின் பிரகடனமாக இருக்கிறது. 1828ல் தனது இருபத்திநாலாவது வயதில் இந்த கவிதையை கீட்ஸ் எழுதியிருக்கிறார். இதை பற்றி தனது காதலி என்னநினைக்கிறாள் என்று தெரிந்து கொள்ள அவர் துடிப்பதை பற்றி ஒரு கடிதம் வெளிப்படுத்துகிறது.

கவிதைகளின் மீது அதீத நாட்டம் கொண்டிருந்த கீட்ஸ் பணநெருக்கடி காரணமாக தொழில்படிப்பில் சேர வேண்டிய கட்டாயம் கொண்டிருந்தார். மருத்துவ மாணவனாக இருந்தபடியே அவர் தீவிர இலக்கியங்களை ஆழ்ந்து கற்றிருக்கிறார். அவரோடு மருத்துவம் படித்த ஹென்ஸி ஸ்டீபன் என்ற மாணவர் கீட்ஸ் மருத்தும் குறித்துபேராசிரியர் வகுப்பு நடத்திக் கொண்டிருக்கும் போது தனது குறிப்பேட்டில் கவிதைகள் எழுதிக் கொண்டிருப்பார். என்று சில வேளைகளில் மருத்துவ குறிப்புகளை கூட கவிதையாக எழுதுவது உண்டு இதன் உச்சமாக ஒரு நாள் நோயாளியின் பேண்டேஜ் மீது ஒரு நீண்ட கவிதையை எழுதினார் கீட்ஸ் அதை மருத்துவமனையே வேடிக்கை பார்த்தது என்று நினைவுகூர்ந்திருக்கிறார்.

கீட்ஸின் முதல் புத்தகம் கவனம்பெறவேயில்லை. அதில் மனச்சோர்வு கொண்ட அவர் தானே தேடி சென்று நண்பர்களிடம் தனதுகவிதைகளை தந்து அபிப்ராயம் கேட்டிருக்கிறார். அவருக்கு கிடைத்தது அத்தனையும் அவமானங்களே. அந்த உத்வேகமே அவரை புதிய கவிதை தளத்தை நோக்கி திருப்பியது. அவரது மூன்றாவது கவிதை தொகுப்பான Endymion புகழ்பெற்றதோடு கீட்ஸ முக்கிய இளங்கவியாக அடையாளம் காட்டியது.

ஜேன் கேம்பியானின் பிரைட் ஸ்டார் கீட்ஸின் மனக்கொந்தளிப்பின் மீதே நகர்கிறது. இசையும் ஒளிப்பதிவும் சொற்களின் துணை அதிகமின்றி கீட்ஸின் மனதை நமக்கு நெருக்கம் கொள்ள வைக்கின்றன. ஒரு வகையில் கீட்ஸின் காதலின் வழியே ரொமான்டிக் கவிதைகளின் காலத்தை இப்படம் மீள்உருவாக்கம் செய்கிறது. அந்த வகையில் இது கவிஞனின் காதலைப்பற்றிய தூய கவித்துவமான படமாகும்.

Comments are closed.

Leave a Reply

Archives
Calendar
December 2017
M T W T F S S
« Nov    
 123
45678910
11121314151617
18192021222324
25262728293031
Subscribe

Enter your email address: