குறும்படங்கள்


சமீபத்தில் நான் பார்த்த முக்கியமான குறும்படங்கள் இவை. குறும்படங்கள் எப்படி அமைய வேண்டும் என்பதற்கான உதாரணங்களாக இவற்றைச் சொல்லலாம். ஐந்து நிமிசங்களுக்குள் உருவாக்கபட்ட இந்தப் படங்கள் ஆழமான மனப்பாதிப்பை உருவாக்குகின்றன.



எவ்வளவு காட்சிகள் இடம் பெற வேண்டும். எப்படி காட்சிகளை படமாக்க வேண்டும். எப்படி படத்தொகுப்பு செய்ய  வேண்டும் என்று இந்தப் படங்களில் இருந்து நிறைய கற்றுக் கொள்ளலாம். குறும்படம் இயக்க நினைப்பவர்கள் இதை தரவிறக்கம் செய்து வைத்துக் கொண்டு தொடர்ந்து பார்த்து அதற்கான திரைக்கதையை ஒளிப்பதிவை அவதானித்து வரவேண்டும்.


இந்தப் படங்களை உருவாக்கியவர்கள் சமகால சினிமாவின் முக்கிய இயக்குனர்கள். உலக திரைப்படவிழாக்களில் பல்வேறு முக்கிய விருதுகள் பெற்ற இந்த இயக்குனர்கள் முழு நீளப்படங்களுடன் இது போன்ற குறும்படங்களை உருவாக்குவதிலும் அதிக ஆர்வம் காட்டி வருகிறார்கள்.


ஒரு பிரச்சனை இரண்டு வழிகள். – அபாஸ் கிராஸ்தமி


அபாஸ் கிராஸ்தமி ஈரானின் முக்கியமான இயக்குனர். 1975ம் ஆண்டு அவர் இயக்கிய இந்த நான்கு நிமிச குறும்படம் பள்ளியில் படிக்கும் இரண்டு மாணவர்களை பற்றியது. ஒருவன் புத்தகத்தை மற்றவன் கிழித்துவிடுகிறான். உடனே மற்றவன் அவன் ஸ்கேலை உடைத்துவிடுகிறான். உடனே ஆத்திரமாகி அவன் பேனாவை பிடுங்கி உடைக்கிறான் . உடனே மற்றவன் தொப்பியை பிடுங்கி ஆத்திரப்படுத்துகிறான் இப்படி  சிறார்களின் உண்மையான அகவுலகை சித்தரிக்கும் அதே நேரம் சிறார்கள் எப்படி நட்பாக நடந்து கொள்ள வேண்டும் என்பதையும் படம் விளக்குகிறது. இரண்டு சிறுவர்கள் இதில் நடித்திருக்கிறார். வெகு இயல்பான நடிப்பு. காட்சி கோணங்களும், நிகழ்வுகள் சொல்லப்பட்ட விதமும் இசையும் படத்தொகுப்பும் அற்புதமாக உள்ளன


Two solutions for one problem Abbas Kiarostami, 1975


http://in.youtube.com/watch?v=L7534pgShEk



 


மறுசந்திப்பு- டொர்னாடோ குசாபே



சமீபத்தில் நடந்த ஒலிம்பிக்ஸ் விழாவிற்கு சில மாதங்களுக்கு முன்னால் ஐந்து முக்கிய இயக்குனர்களை அழைத்து சீன அரசு ஐந்து குறும்படங்களை எடுத்து தரச் சொல்லியது. அந்த படங்கள் ஒலிம்பிக்கிற்கான வரவேற்பு படங்கள் போல இருக்க வேண்டும் என்று விரும்பியது. அந்த வரிசையில் சினிமா பாரடிஷோ படத்தை இயக்கிய டொர்னாடோ குசாபே இயக்கிய படமே ரீ யூனியன்


ஒரு வயதான ஆசிரியர் தனிமையில் இருப்பதை ஒரு சிறுவன் காண்கிறான்.  அவரிடம் முன்பு படித்த கண்டு மாணவர்கள் இன்று வளர்ந்து ஏதேதோ துறைகளில் பெரியவர்களாக இருக்கிறார்கள். அத்தனை பேரும் ஆசிரியரோடு மறுசந்திப்பிற்கு வருகை தருமாறு ஏற்பாடு செய்கிறான். இந்த படம் கதை சொல்லும் முறையிலும் ஒளியமைப்பிலும் இசையிலும் ஒரு சிறிய கதையின் ஊடே சீன கலாச்சாரம் சமகால வாழ்க்கை, ஒலிம்பிக்ஸ், ஆசிரியர் மாணவர் நட்பு என்று பல்வேறு தளங்கள் இயங்குவது மிக சிறப்பாக உள்ளது.


Giuseppe Tornatore- Reunion


http://in.youtube.com/watch?v=RIBpfLkbAiU



தடை செய்யப்பட்ட வாத்து – டிஸ்னி.



வால்ட் டிஸ்னியின் இந்த அனிமேஷன் படம் பல ஆண்டுகாலமாக  தடை செய்யப்பட்டிருந்தது. அதற்கு முக்கியமான காரணம் இந்தப்படம் ஹிட்லரை கேலி செய்து டிஸ்னியால் உருவாக்கபட்ட படமாகும். டொனால்டு டக் கதாபாத்திரத்தின் வழியே ஹிட்லரின் முட்டாள்தனங்கள் கேலி செய்யப்படுகின்றன. இரண்டாம் உலக யுத்த நாட்களில் இந்த படம் தடை செய்யப்பட்டிருந்தது. அதன் பிறகும் பலவருசம் இது வெளியாகவே இல்லை. சமீபத்தில் இப்படம் புத்துருவாக்கம் செய்யபட்டு திரையிடப்பட்டிருக்கிறது.
டிஸ்னி உருவாக்கிய மிகச் சிறந்த பொலிடிகல் அனிமேஷன் படம் இது என்று விமர்சகர்கள் குறிப்பிடுகிறார்கள். அது முற்றிலும் உண்மை.


Donald Duck – Der Fuehrer`s Face


http://in.youtube.com/watch?v=mZiRiIpZVF4



வர்ண ஜாலம்.  மஜித் மஜித்



ஒலிம்பிக்கிற்காக ஈரானிய இயக்குனர் மஜித் மஜித் இயக்கிய குறும்படம் கலர்ஸ் ப்ளே. மஜித் மஜித்தின் படங்கள் சிறுவர்களின் உலகையே தொடர்ந்து மையக்கொள்பவை. உலக திரைப்பட விழாக்களில்  அவர் பெற்ற விருதுகளின் எண்ணிக்கை நூறை தாண்டியிருக்கும். அவ்வளவு பெரிய இயக்குனர் இந்த குறும்படத்தை இயக்கியிருக்கிறார்



ஒலிம்பிக்கை முன்னிட்டு சிறுவர்கள் தங்களின் விருப்பமான ஆசைகளை பலூனில் எழுதி பறக்க விடுகிறார்கள். அப்படி பறக்க விடுவதற்காக சைக்கிளில் பயணம் செய்கிறார்கள். இந்த பயணமும் பறக்கும் பலூன்களும் சிறார்களின் சந்தோஷமும் ஒன்று சேர்ந்ததே இந்தக்குறும்படம்


சந்தோஷத்தை வெளிப்படுத்தும் சிறுவர்களின் முகங்கள், விதவிதமான சாலைகள், சைக்கிள்கள் என்று ஐந்து நிமிசபடத்திற்குள் எத்தனை காட்சிகள். எத்தனை கோணங்கள். தேர்ந்த இசை, ஒளிப்பதிவு. அருமையான படத்தொகுப்பு.


 


Colors Fly by Majid Majidi


http://in.youtube.com/watch?v=zjV6Qs3fGnY


 


தேநீரின் மணம்


ஒரு குமிழ் பரப்பில் சிறிய புள்ளி தன் இடத்திலிருந்து நகர்ந்து நகர்ந்து பயணிக்கிறது. அவ்வளவு தான் இந்த குறும்படம். சர்ரியலிச படம் போலவும் குறியீட்டு தளத்தில் அமைந்த படம் என்றும் எப்படி வேண்டுமானாலும் புரிந்து கொள்ளலாம். நவீன ஒவியம் போல வரையப்பட்டிருக்கிறது. புள்ளியின் பயணமும் அது தடைபடும் இடங்களும் சந்திக்கும் வெளியும் வாழ்வை பற்றிய உண்மைகளை விளக்குவதை போலவே உள்ளது.
இந்த படத்தின் பெரிய பலம் இசை. புள்ளியின் பயணமும் இசையும் பிரிக்க முடியாதபடி ஒன்று கலந்திருக்கின்றன.


The Aroma of Tea


http://in.youtube.com/watch?v=ErPcbuHqzjU&feature=related


**


 


 


 

Comments are closed.

Leave a Reply

Archives
Calendar
December 2017
M T W T F S S
« Nov    
 123
45678910
11121314151617
18192021222324
25262728293031
Subscribe

Enter your email address: