காலத்தை செதுக்குதல்


Art could be said to be a symbol of the universe, being linked with


that absolute spiritual truth which is hidden from us in our positivistic, pragmatic activities.



கடந்த இரண்டு நாட்களாக தார்கோவெஸ்கியின் புத்தகத்தை வாசித்து கொண்டிருக்கிறேன்.


ரஷ்ய நவீன சினிமாவின் தனிப்பெரும் ஆளுமை ஆந்த்ரேய் தார்கோவெஸ்கி ((Andrey Tarkovsky). அவர் எழுதிய Sculpting in time  சினிமாவை பற்றிய தார்கோவெஸ்கியின் புரிதல்களை அனுபவங்களை பேசுகிறது.  கடந்த 25 ஆண்டுகளில் வெளியான மிக சிறந்த சினிமாவை பற்றிய புத்தகம் இதுவே என்பேன். 245 பக்கங்கள் கொண்ட இந்த புத்தகம் இன்று பல்வேறு திரைப்பட கல்லூரிகளில் பாடப்புத்தகமாக வைக்கபட்டுள்ளது. இதன் சில பகுதிகள் தமிழில் மொழியாக்கம் செய்யப்பட்டு தனி நூலாக வெளியாகி உள்ளது.


தார்கோவெஸ்கியின் திரைப்படங்கள் மிகுந்த கவித்துவமானவை. படிமங்களும் குறியீடுகளும் உருவகங்களும் ஆழ்ந்த மனவெழுச்சியும் தரக்கூடியவை. ஆன்மீக தேடுதலுக்கான திரைப்படங்கள் என்று அவற்றை இன்று வகைப்படுத்துகிறார்கள்.



நான் தார்கோவெஸ்கியின் முக்கிய படங்கள் அத்தனையும் பார்த்திருக்கிறேன். என் வரையில் அவை மனித மனதின் செயல்பாடுகள், குறிப்பாக பிரிவு வேதனை வலி துக்கம் சந்தோஷம் போன்றவற்றை பற்றிய ஆழ்ந்த விசாரணையை மேற்கொள்கின்றன. தார்கோவெஸ்கியின் சினிமா காட்சிகளின் வழியே கதையை சொல்வதற்காக உருவாக்கபட்டவையல்ல. மாறாக திரைப்படத்தினை அவர் ஒரு ஆற்றுபடுத்துதல் போன்ற செயல்பாடாக கருதுகிறார்.


மனிதனின் ஆறாத துயரங்களை புரிந்து கொள்ளவும் அதிலிருந்து மனிதனை சாந்தப்படுத்துவதற்கும் கலை மிக அவசியமானவை. குறிப்பாக சினிமா சமகால அரசியல் சமூக நெருக்கடிகள் மனிதனை எப்படி அடையாளமற்று செய்கின்றன. மதத்தை பற்றிக் கொள்ள முடியாத ஆனால் நம்பிக்கையை தேடிய அலையும் இருப்பின் அவஸ்தைகளை அவர் விவரிக்கிறார்.


நம் காலத்தின் உன்னத இயக்குனர் என்று தார்கோவெஸ்கியை அகிரா குரசோவா பாராட்டுகிறார். அத்துடன் அவர் படம் பிடிப்பதை நேரடியாக சென்று பார்த்து வியந்த அகிரா குரசோவா தார்கோவெஸ்கி ஒரு பிரபஞ்சத்தையே உருவாக்கி காட்டுகிறார் என்று வியந்து சொல்கிறார்.


தனது திரைப்படங்களை புரிந்து கொள்ள முடியவில்லை என்று பல்வேறு தரப்பான பார்வையாளர்கள் எழுப்பிய கேள்விகளில் இருந்தே தார்கோவெஸ்கி இப்படியான ஒரு புத்தகத்தை எழுத முன்வந்திருக்கிறார். ஒன்பது அத்யாயங்களாக பிரிக்கபட்டுள்ள இந்த புத்தகம் தார்கோவெஸ்கியின் சினிமாவை பற்றி மட்டும் பேசவில்லை. மாறாக திரைக்கலையின் நுட்பங்களை, குறிப்பாக அதன் ஒளிப்பதிவு, திரைக்கதை, உருவாக்கம். நடிப்பு .திரைஇசை, சினிமா பார்வையாளர்கள் என்று தனித்தனியாக கவனம் கொண்டு ஆழ்ந்து விவாதிக்கிறது.


திரைக்கலையின் நுட்பங்களை ஆசானை போல தார்கோவெஸ்கி இந்நூலின் வழியே நமக்கு கற்று தருகிறார். அவை வெறும் தகவல்கள் இல்லை. மாறாக அவரது திரைப்படங்களை போலவே எழுத்தும் அடர்த்தியான படிமங்களையும் கவித்துவ செழுமையும் கொண்டிருக்கின்றன.


பகமலோவ் எழுதிய இவான் என்ற சிறுகதையை தார்கோவெஸ்கி Ivan`s Childhood,
 என்றபடமாக உருவாக்கியிருக்கிறார். எது ஒரு சிறுகதையை திரைப்படத்திற்கான கருவாக முடிவு செய்கிறது என்பதை பற்றியே அவரது முதல் அத்யாயம் பேசுகிறது. அதில் . கவிதை வாழ்வை அணுகுவதை போன்று உணர்ச்சியோடும், கச்சிதமாகவும் தனித்துவமான பார்வை மற்றும் மொழியுடன் உள்ள கருப்பொருட்களே தன்னை வசீகரிக்கின்றன என்கிறார்.


 இவானின் பால்யகாலம் படத்தில் யுத்தமுனையில் ஒரு சிறுவன் செய்திகொண்டு செல்பவனாக பணியாற்றிய நிகழ்வுகளை விவரிக்கிறது. சிறுவன் பற்றி யுத்தமுனையில் உள்ள படைப்பிரிவிற்கு தான் சேகரித்த தகவல்களுடன் வந்து சேர்கிறான். அவன் மனதில் யுத்த அவலக்காட்சிகள் நிரம்பியிருக்கின்றன. உறக்கத்தில் அவனது கனவு விசித்திரமாக வெளிப்படுகிறது. இது வரை நான் பார்த்த கனவுகாட்சிகளில் இவானே ஆக சிறந்தது என்பேன். அது ஒரு கனவு என்று பார்வையாளர்கள் துல்லியமாக உணரும்படி உருவாக்கட்டிருக்கிறது.


கடற்கரையில் ஆப்பிள்கள் உருண்டுகிடக்கின்றன. ஒரு குதிரை அதை மேய்ந்தபடியே அலைந்து கொண்டிருக்கும் காட்சிபடிமமானது  குறியீடாக வெளிப்படுகிறது. காட்சி கோணங்கள் மற்றும் காட்சியின் வேகம் யாவும் தனித்துவமானதாக உள்ளது. சர்ரியலிச ஒவியம் ஒன்றினை போல அந்த காட்சி நீள்கிறது. பனியும்  நெருப்பும் இரண்டு முக்கிய படிமங்களாக உள்ளன.


இரண்டாம் அத்யாயம் கலை குறித்த தார்கோவெஸ்கியின் எண்ணங்களை விவரிக்கிறது. இதில் ஒரு தேசத்தின் இலக்கியம் மற்றும் இசை கலைகளின் பாதிப்பிலிருந்தே அதன் சினிமா உருவாக வேண்டும். செவ்வியல் இலக்கியங்கள் மற்றும் கதைமரபுகள் சினிமாவை உருவாக்குவதில் முக்கிய பங்கு வகிக்கிறது. ஸ்பெயின் கலாச்சார கூறுகளை உள்ளடக்கியே லூயி புனுவலின் படங்கள்உருவாக்கபட்டுள்ளன. இதை விலக்கி அவரை தனியே காண இயலாது. செர்வான்டிஸ் துவங்கி பிகாசோ வரையான பாதிப்பை ப்யூனுவல் திரைப்படங்களில் காணலாம் என்கிறார். மரபு ஒவியங்கள் திரைப்பட உருவாக்கத்தில் முக்கிய பங்கு வகிக்கின்றன. ஸ்பானிய நிலக்காட்சி ஒவியங்களில் இருந்தே தனது படத்தின் நிறம் மற்றும் காட்சிகளின் வடிவத்தை ப்யூனுவல் உருவாக்குகிறார். அதுவே தனது பாணியும் என்கிறார் தார்கோவெஸ்கி.


இதற்கு உதாரணமாக தார்கோவெஸ்கி இயக்கிய ஆந்த்ரே ரூபலோவ் என்ற ஒவியரை பற்றிய திரைப்படத்தை சொல்லலாம். ஒவியரின் அகநெருக்கடிகளையும் தரிசனங்களையும் விவரிக்கும் இந்த படத்தின் காட்சியமைப்பு ஒவியத்தின் அதிக பட்ச சாத்தியங்களை உள்வாங்கியிருக்கிறது.
தஸ்தாயெவ்ஸ்கியின் புனைகதைகளே தனது வாசிப்பில் மிக உயர்ந்த இலக்கிய பிரதிகள் எனும் தார்கோவெஸ்கி அவற்றை தனது எழுத்தின் மூலமாக விரிவாக அடையாளம் காட்டுகிறார்.


ஆழ்ந்த இலக்கிய வாசிப்பின் வழியே தான் திரைப்பட இயக்குனர் உருவாக முடியும் எனும் தார்கோவெஸ்கி ஜப்பானிய ஹைக்கூ வடிவத்தை தனது திரைப்படங்களின் காட்சிகளுக்கான தூண்டுதலாக குறிப்பிடுகிறார். மூன்று தனிப்பட்ட காட்சிகளின் வழியே ஒரு அனுபவத்தை தரும் ஹைக்கூ தான் திரைக்கதையின் முக்கிய அம்சம். அந்த கவிதைகளை போல துல்லியமாக, ஒன்றோடு ஒன்று முரண்படும் இரண்டு விசயங்களை தான் ஒரே காட்சியில் ஒன்று சேர்ப்பதாக சொல்கிறார். காட்சிகள் படிமமாகின்ற விந்தை இப்படியே நடக்கிறது என்று விளக்குகிறார்.


Becoming an artist does not merely mean learning something, acquiring professional


techniques and methods. Indeed, as someone has said, in order to


write well you have to forget about grammar. Though, of course, in order to forget it you have first to know it.


தார்கோவெஸ்கியின் திரைப்படங்கள் தரும் அனுபவத்தை நிகர் செய்கிறது இந்த புத்தகம்.. இரண்டு முறை இதை முழுமையாக வாசித்திருக்கிறேன். ஒவ்வொரு முறையும் அது தரும் நெருக்கமும் அறிவும் சினிமாவைப் புரிந்து கொள்வதை  மேம்படுத்துகிறது



Films directed by Tarkovsky


1.      The steamroller and the violin


2.      Ivan`s childhood


3.      Andrei Rublev


4.      The mirror


5.      Solaris


6.      Stalker


7.      Nostalghia`


8.      The Sacrifice


**

Comments are closed.

Leave a Reply

Archives
Calendar
December 2017
M T W T F S S
« Nov    
 123
45678910
11121314151617
18192021222324
25262728293031
Subscribe

Enter your email address: